رفيقة العمر

أقولك سر سعات بجيب صورتك
و أقعد أتملى منك و أفتكر اللى كان
كل الذكريات قصص و حكاوى زمان
و بتنهيده أقفل الصوره
لكن جوه منى تتفتح مية صوره
لينا فى المدارس بالمريلة الكحلى
فى دكه حفرنا أسمى انا و انتى
فى حصة أتكلمنا و على أسرارنا قولنا
تتفتح مية ذكرى لينا فى الجامعه
مع أول حيرة و كسرة قلب
مع أول قصة حب
مع طرق فكرانا مش نسيانا
كنا فيها تهنا أو كنا نحب هدؤها
مع حمص شام على الطريق
أو فطيرة من محل لما قفل زعلنا
و سندوتش فول او حوواشى على مترو أكلنا
و تحويشة أسبوع علشان نروح سنيما
جوه منى مية مكالمة
فى الطريق من الشغل نونس بعض
أخبار صحابنا القدام
أحلامنا فى أننا نعلى أزاى
تشجيعنا لبعض على طاعة الله
أقولك سر يا رفيقة العمر
بجيب صورتك و أقفلها و أنا زعلانه
و مية سؤال جوايا
عن ليه أتغيرنا؟!
و ليه أفترقنا ؟!

قلوب

 

 يا بخت مَن حب بنص قلبه
و بالنص التانى حب بيه نفسه
و يا عينى على قلب حب بكل ما فيه
ما عنش حته لنفسه
يا بخت قلب لقى قلب يقاسمه همه
و عمل منه حيطه يتسند عليه
من غير ما يقوله تعبت, ليه, و علشان أيه
و يا عينى على قلب شال كل الهم
و لقى سعادته فى ضحكة قلب
مبيسألش حتى عليه
يا بخت قلب لقى قلب يمسحله دمعه
يرسمله بسمه فى عنيه
و يا عينى على قلب مسح الدمع
و فى الآخر بكى وحده
و يا مقسم القلوب للقلوب
ريح كل القلوب و من ضمنهم قلبى ♥

لما

لما تبطل تحاول

و تسيب الحبل من أيدك
لا تشد و لا ترخى
بس تسيبه و تمشى
------------------------------
لما تطلع برا الدوامه
و تبطل تلف فى دواير
-----------------------------
لما يكون كل شىء غير منطقى
فترحل عن كل حياتك
تسيب نفسك وراك
---------------------------------
لما تتعبك الأيام
و الحزن يعلم فى ملامحك
و يكتر تجاعيد وشك
------------------------------
لما يحكى شعرك الأبيض
حواديت زمانك
-----------------------
مش شرط تكون عجوز عديت الخمسين
بس ممكن تكون شاب كبر قبل أوانه بكتيييير

زحمة فى راسك

لما يكون فى زحمة فى راسك
أزحم من أى ميدان
و تكون وسط الزحمه دى طفل
مبرق للناس
و فى وسطه الزحمة تضيع أفكارك
شرق و غرب .. يمين وشمال
تيجى هنا و تروح هناك
تلملم نفسك تجمع حالك
و تقعد فى أى مكان
تبعتر ورقك و تشوف مالك
و ليه مايل الحال؟
و متلقيش و لا أى جواب
تشد شعرك تخبط راسك
و تروح تنام
ساعه ساعتين متطولش
كأنك وراك الديوان
و صفارة فى عقلك تضرب
تصحيك من أحلى منام
تقولك فك العركه فك الشبكه
وبعدين روح نام
فكرك رايح جاى
و أيدك على الخد كمان
و انت رايح جاى
و مفيش ولا أى جواب
مفيش هوا نفسك قطع
أتاريك نسيت تاخد نفس
وسط زحمة الميدان

قصتنا ليست بخيالية

عزيزى قصتنا ليست بخيالية
لست بفارس و لست بأميرة
قصتنا تنتمى لأرض الواقع
حيث تنعدم كل الأحتمالات
تُقتل فيه كل الأحلام
تُحاول مرار و أُحاول مرار
و تأبى محاولاتنا النجاح
قصتنا لا تملك القدره على الأرتفاع
لملامسة النجوم و مؤانسة القمر
لا تملك القدرة على التغير
لتنتمى إلى عالم خيالى
لتحتوى على جنيات تحقق الأمانى
قصتنا......لا تنطوى على اى قصص
فقط كنت تبحث عن العقل و وجدته
فقط كنت أبحث عن الأمان و وجدته
ثم وضِعت نقطه و نفذ الحبر و الورق
لا شىء آخر نكتبه لا شىء آخر يقال عنا
و لن يتذكرنا الزمان.