رفيقة العمر

أقولك سر سعات بجيب صورتك
و أقعد أتملى منك و أفتكر اللى كان
كل الذكريات قصص و حكاوى زمان
و بتنهيده أقفل الصوره
لكن جوه منى تتفتح مية صوره
لينا فى المدارس بالمريلة الكحلى
فى دكه حفرنا أسمى انا و انتى
فى حصة أتكلمنا و على أسرارنا قولنا
تتفتح مية ذكرى لينا فى الجامعه
مع أول حيرة و كسرة قلب
مع أول قصة حب
مع طرق فكرانا مش نسيانا
كنا فيها تهنا أو كنا نحب هدؤها
مع حمص شام على الطريق
أو فطيرة من محل لما قفل زعلنا
و سندوتش فول او حوواشى على مترو أكلنا
و تحويشة أسبوع علشان نروح سنيما
جوه منى مية مكالمة
فى الطريق من الشغل نونس بعض
أخبار صحابنا القدام
أحلامنا فى أننا نعلى أزاى
تشجيعنا لبعض على طاعة الله
أقولك سر يا رفيقة العمر
بجيب صورتك و أقفلها و أنا زعلانه
و مية سؤال جوايا
عن ليه أتغيرنا؟!
و ليه أفترقنا ؟!